Vardar Fans
На теренот на Академијата, генерацијата 2006 со убедлива победа ја стартуваше дебитантската сезона во регионалната-скопска лига. Вардар во дербито ја прегази екипата на Шкендија со резултат 6:0.
Тренерот Спасески го започна мечот со следниве 11-сетмина: Данстак, Николов, Порчу (c), Спасовски, Настевски, Миовски, Нуредини, Величковски, Николовски, Ајетовиќ, Алији.
Вардар доминираше на теренот во првото полувреме, ги искористи своите шанси и успеа да постигне три гола во противничката мрежа, додека Шкендија имаше само еден директен удар кон нашиот гол, кој го одбрани Андреј Данстак. Квалитетот, но и желбата за победа беа поголеми кај вардарци, кои едноставо го прегазија својот најголем ривал за трофејот оваа сезона. Прв кој се обиде да го отвори резултатот беше Нуман Ајетовиќ кој повлече една топка, се создаде простор, шутираше, но голманот на Шкендија одбрани и спречи рана негатива за својот тим. Вардар успева да го отвори резултатот за 1:0, токму со голот на Ајетовиќ кој денес доби офанзивни задачи од тренерот Спасески, и тоа се покажа како вистинско решение. Откако проигра Величковски, акцијата во гол ја претвори Нуман Ајетовиќ за водство на Вардар.
Истиов играч успеа да ни донесе и водство од 2:0, а одбраната на Шкендија повторно „спиеше“, тоа го користи Нуман за зголемување на резултатот. Нашите млади надежи имаа целосна контрола на играта на теренот, офанзива и константен притисок на половината на противникот. До крајот на првиот дел уште еднаш ја тресеме мрежата на тетовчани. Се играше акција од левата страна, кога Нуредини, додаде топка во противничкиот шеснаестник, на вистинското место се најде Алтин Алији кој зголеми на 3:0, резултат кој се покажа актуелен на полувреме.
Вардар беше надмоќен и во вториот дел, едноставно гостинската екипа немаше што да бара на овој меч. Иако имавме високо водство од првиот дел, момците на Спасески не застанаа ниту во второто полувреме. Нуман Ајетовиќ денес одигра перфектен меч и со својот хет-трик успеа да зголеми на 4:0, додека со вториот гол на Алтин Алији поведовме и со високи 5:0. Тренерот на Вардар им даде шанса за игра на сите играчи, така во второто полувреме влегоа Јанкоски, Динов, Краљевски, Цониќ, Илески, Цековски и Танчев. До крајот на натпреварот уште еден гол во мрежата на Шкендија, дело на Марко Николовски за 6:0, прв за овој играч на денешното дерби. Екипата од Тетово имаше удар, но одбрани Краљевски. На крајот, убедлива победа за Вардар со резултат 6:0.
