Кадетите на РК Вардар триумфираа со пеколен финиш над селекцијата на Грција, на турнирот во БиХ

На силниот меѓународен турнир во Брчко, Босна и Херцеговина кадетите на Вардар се сретнаа со селекцијата на Грција.  На овој дуел од „Локомотива купот  2018“  избраниците на Андријана Будимир и Ацо Станковски со пеколен финиш дојдоа до минимална победа изразена со резултат 19-18.

Ние почнавме со гол на Давид Савревски за 1-0, по што ривалот со два врзани погодоци поведе со 2-1. Следеше игра гол за гол, двата тима постигнаа по три погодоци за 5-4 предност на грците. Момците на Будимир и Станковски се “разбудија“ влегоа во серија, во одбраната одиграа на ниво и со серија 4-0 го преземавме водството. За предност од 8-5 погоди Бојан Чакалиќ. Противникот во последните минути со три гола успеаа да ја врати резултатската симетрија, на пауза заминавме со резултат 8-8.

Вториот дел почна со игра гол за гол, двата тима постигнаа по четири гола, резултатот и понатака беше реми, 12-12. Противникот со серија 3-0, ни се одлепи тие поведоа со 15-12, го чуваа водството и пред крајот имаа залиха од два гола 18-16. Сепак нашите момци се издигнаа во финишот покажаа карактер и одиграа пеколно. Во одбраната “спуштивме ролетна“ во нападот погодија Чакалиќ и  Калајџиески  за реми, додека  Димитријевски  донесе победа со голот за 19-18.

Прв стрелец повторно беше Чакалиќ Бојан со 6 гола,  додека тројца играчи имаа по три погодоци: Дамјан Димитријевски, Давид Савревски и Симон Калајџиески.