Македонија подобра од Израел, сите вардарови играчи се запишаа во листата на стрелци, Томовски солиден на голот

Ракометната репрезентација на Македонија одигра нов подготвителен натпревар во пресрет на Европското првенство. Момците на Кирил Лазаров беа домаќини на репрезентацијата на Израел, која ја победија со резултат 31:28.

Во првото полувреме гледавме осцилации во играта на нашата репрезентација и менување на предноста. На моменти имавме и позитива од два гола, но дозволивме истата да ја загубиме и да ја препуштиме на противникот. На полувреме, Израел замина со позитива од еден гол разлика (14:15).

Гостите одржуваа водство од 1-2 гола разлика, се до средината на вториот дел, кога избраниците на Лазаров  направија серија, ја превземаа предноста и не дозволија да ја испуштат до крајот. Натпреварот заврши со наша победа од 31:28.

Од вардаровите играчи, Мартин Томовски на голот имаше 4 одбрани. Филип Талески постигна 4 гола, Марко Мишевски 3, Стојанче Стоилов 2 и Гоце Георгиевски 1 погодок.

Двете репрезентации вечерва од 18:00 часот во С.Ц. Борис Трајковски ќе го одиграат и вториот контролен натпревар, кој ќе биде последен тест за Македонија пред почетокот на ЕП.