Денес во С.Р.Ц. Кале се одигра натпревар во групата 2 од младинската ракометна лига, помеѓу екипите на Вардар Јуниор и Борец од Велес. Подобра беше гостинската екипа, која на крајот триумфираше со резултат од 23:28.
Интересно е што се до 25 минута од првото полувреме ниту една од екипите немаше поголема предност од еден гол. Вардар и Борец постојано се менуваа во водство, но тоа не беше поголемо од еден гол разлика. Последните пет минути од првото полувреме му припаднаа на Вардар Јуниор, кој од негатива од 9:10 успева до истекот на првите 30 минути да направи серија од 5:1 и на одмор да се замине со предност од 14:11.
Брзо во второто полувреме, гостинската екипа успева да направи резултатска симетрија, кога по само шест минути игра резултатот беше повторно израмнет на 16:16. Идентично како во првото, така и во овој дел од натпреварот се играше гол за гол, но во последните десет минути од мечот подобро се снајде противничката екипа. Имаа избраниците на Пепи Манасков и предност од 20:19, за да му дозволат на Борец да направи серија од 0:3 и да поведе со 20:22. Вардар не успеа да се врати на натпреварот, иако резултатот се уште беше неизвесен се до последните три минути, кога на семафорот стоеше 23:25 за екипата на Борец. Сепак Велешани беа тие кои со три нови гола, ги поставија конечните 23:28 на овој дуел од младинската лига.
Вардар Јуниор во своите редови ги имаше само расположените Никола Хаџидимовски кој постигна 9 и Дамјан Јакимовски, кој беше стрелец на 8 голови. Кај победничкиот тим се истакна поранешниот Вардарец, Филип Николов кој зад своето име запиша 11 погодоци.
Вардар Јуниор: Василевски 1, Игнов, Еленин, Антевски 2, Симевски 1, Нанов, Јакимовски 8, Јаховиќ 1, Талески, Хаџидимовски 9, Блажевски, Илиевски, Тевдовски, Чупетрески, Камчев, Стојановски.