Vardar Fans
Натпреварот во ракометната Јуниор лига, помеѓу екипите на РК Урдаревски и Академија 1 во машка конкуренција заврши со нерешен резултат од 18:18. Овој меч се одигра во големата сала на спортскиот ракометен центар Јане Сандански во генерацијата родени 2000/01 година.
Мечот започна со гол на Академија 1, но екипата на Урдаревски во следните минути успева да поведе со резултат 4:2. Двете екипи имаа свои периоди на игра, така Академија 1 прави серија од три последователни голови за да го преземе водството 4:5. Следеше период во играта, каде двете екипи играа гол за гол. Кога Урдаревски ќе успееше да се одлепи на два гола позитива, Академија 1 враќаше на ист начин, така што и на полувреме резултатот беше нерешен 10:10.
Вториот дел започна одлично за тимот на РК Урдаревски кој ги постигна првите два гола за водство од 12:10. При резултат 13:12, Урдаревски успева да направи серија од 4:0 за да има највисоки 17:12. Кога се чинеше дека ова беше решавачкиот период за конечниот победник, така не мислеше и екипата на спротивната страна. Најпрво намалуваат на 17:15, за во следниот напад Урдаревски да постигне нов погодок. Сепак финишот беше во знак на Академија 1 која постигна три голови а не дозволи да прими. Конечниот резултат гласеше 18:18.
