Патрик Валчак со Полска победи на првиот натпревар на ЕП

Репрезентацијата на Полска за која настапува Патрик Валчак стигна до победа на премиерниот натпревар на Европското ракометно првенство кое се одигрува во Словачка и Унгарија. Полјаците успеаа да бидат подобри во дуелот против репрезентацијата на Австрија.

Австријците подобро го отворија натпреварот со предност од 2:0, некаде до осмата минута се играше израмнето, по што започна Полска да ја превзема предноста и да го контролира натпреварот. Најголемата позитива во првиот дел изнесуваше четири гола разлика, кога резултатот на семафорот гласеше 11:15, за на полувреме да имаат водство од  14:17.

Гледавме ефикасен натпревар на двете страни, на кој подобро се снајде Полска и во вториот дел од натпреварот. Австрија се обидуваше, но никако не успеваше да ја симне границата од три гола негатива, додека Полска во еден момент имаше и високи шест гола предност. На крајот триумфот дојде со резултат 31:36.

На овој натпревар настапи само Патрик Валчак кој постигна два гола, додека Јан Чувара поради позитивен тест на Ковид-19 не беше во составот за овој прв меч на ЕП.