Vardar Fans
Во текот на вчерашниот ден беа одиграни нови натпревари во рамките на ракометната „Јуниор Лига“. Кај генерацијата 2006/07 на програмата беа два натпревари, на кои победи забележаа екипите на РК Филип и РК Ангели.
Екипата на РК Филип од Прилеп го доби дуелот против екипата на Карпош од Куманово. Во најголем дел од дуелот прилепани беа во предност, додека Карпош, само во еден наврат беше во позитива. Екипата на РК Филип поведе со 2:0, но Карпош не дозволи противникот предвреме да се одлепи, па успеаа да намалат на 4:3. Сепак до крајот на првиот дел, тимот од Прилеп направи серија од 3:0, па на кратка пауза се замина со нивно водство од 6:3.
На стартот на вториот дел во игра се врати екипата на Карпош, која најпрво успеа да го израмни резултатот на 6:6, а потоа дури и направи пресврт и за прв пат на мечот да има водство од 6:7. Врати тимот на Филип со мини серија од два погодоци и повторно го врати водството од 8:7. Последното израмнување беше при резултат 9:9, од тој момент видовме серија на прилепчани кои се одлепија на 12:9, период кој се покажа како клучен за победата. До крајот ја задржаа предноста и славеа со резултат 17:13.
На вториот меч кај истата генерација се сретнаа екипите на Будимир и Ангели, натпревар кој минимално го добија тимот на Ангели, со резултат 14:15. Екипата на Будимир поведе со 2:1, но тимот од Волково направи серија од 0:3 и стигна до водство од 2:4. Оваа позитива од два гола ја задржаа до крајот на првиот дел, кога резултатот бепше 5:7.
Во вториот дел екипата на Ангели предводена од Силвана Миленковиќ се одлепи на највисоки три гола разлика (7:10 и 8:11). Сепак избраниците на Андријана Будимир не се предадоа, бодрени од своите навивачи успеаа да ја стопат предноста на Агели, па дури и да го израмнат резултатот на 13:13. Во неизвесна завршница подобро се снајде екипата на Ангели, која славеше триумф со резултат 14:15.
