Младинските екипи на РК Вардар беа активни со одигрување на натпревари

Изминатиов викенд активни со одигрување на натпревари беа младинските екипи на РК Вардар.

Пионерите со висока победа и без примен гол ја започнаа сезоната, откако во спортската сала „Круме Кепески“ беа подобри од тимот на Јуниор К.В. Конечниот резултат на натпреварот гласеше 36:0 (21:0). Најефикасни во нашиот состав беа Лефтеров со 8 и Н.Атанасовски со 7 гола.

Кадетите на првиот натпревар сезонава на домашен терен беа поразени од тимот на Мулти Есенс со резултат 20:34. Откако први успеавме да го отвориме резултатот, што се покажа како единствена предност за нашиот состав на овој натпревар, тимот на Мулти Есенс направи серија и поведе со 2:6. Вардарци заиграа подобро и успеаа да се доближат на само еден гол разлика, кога резултатот гласеше 8:9, но до крајот на првиот дел противникот со серија од 1:6, на полувреме успеа да замине со солидно водство од 9:15.

Први со гол го отворивме и вториот дел, но повторно Мулти Есенс влезе во серија на погодоци, стигна до двоцифрена предност од 10:21 и веќе се беше полесно за гостинот. До крајот на мечот имаа контрола на резултатот и на крајот славеа со убедливи 20:34. Антонијо Трајановски беше најефикасен во нашите редови со 7 голови, додека Огнен Тасевски постигна 4.

Пораз на гостувањето во Прилеп за младинците, кои го загубија натпреварот со резултат 35:24. Имавме водство од 1:2, за Прилеп да направи серија од 5:0 и да го превземе водството. Во еден момент, домашниот тим имаше и највисоки седум гола разлика, за Вардар да намали на 13:9. Во последните осум минути од првиот дел, Прилеп беше подобар на теренот, за на полувреме да има висока предност од 18:11.

Нашите младинци во вториот дел се заканија на предност на Прилеп, се доближија на само четири гола негатива (24:20), но сепак домаќинот врза три гола во серија и поведе со 27:20. До крајот предноста ја зголемија и славеа со двоцифрена разлика. Андреј Јанакиевски со 6 гола беше најефикасен во нашите редови.