Vardar Fans
Руската ракометна репрезентација за која настапуваат четворица играчи од Вардар стигна до првата победа на мундијалот, откако попладнево ја совладаа селекцијата на Кореја.
Кореја имаше само едно и единствено водство и тоа на почетокот кога успеа да го отвори резултатот, по што Русија врати со три гола во серија, по еден на Шишкарев, Дибиров и Косоротов за предност од 3:1. И на овој меч главниот збор го имаа вардаровите играчи, кои придонесоа за првиот триумф, откако вчера ремизираа со селекцијата на Србија. По 10.минути игра со погодокот на Шишкарев имаа водство од 7:4, за серијата да продолжи и во следните минути, кога погодија Дибиров и повторно Шишкарев, за највисоки шест голови разлика (10:4) во 13.минута од натпреварот. Одличен на голот беше и Киреев кој стигна до својата четврта одбрана. Интересно во 19 минута, резултатот беше 13:7, а Шишкарев стигна до својот 6 гол, а целиот состав на Кореја имаше постигнато седум погодоци. Одлично играа избраниците на Кокшаров на овој дуел и постојано ја зголемуваа предност, која најмногу достигна 8 гола позитива (17:9) во 25 минута. Следеше серија на Кореја од три последователни погодоци за да ја смали негативата на 17:12, а истата ја прекина пикерот на Вардар, Калараш кој ги постигна следните два гола за Русија. По првиот дел, “зборнаја„ има водство од 20:13. Се истакна Шишкарев со 6 голови од 7 обиди, како и голманот Киреев со 8 успешни интервенции.
Кокшаров реши во во второто полувреме да ги одмори Дибиров и Шишкарев, но и тоа не претставуваше проблем за Русија да ја одржува високата предност. По 43 минути игра резултатот беше 26:18, а играта поради три исклучувања, што значи и црвен картон, мораше да ја напушти Дмитри Кисељев. Уште еден дебитант во руската рпрезентација на мундијалите, десното крило, Фокин успева да се запише во листата на стрелци и да и донесе на својата селекција најголеми девет голови позитива (29:20) во 48 минута. Остатокот од натпреварот беше рутина за Русија, која слави победа со резултат 34:27.
Шишкарев беше најефикасен на натпреварот со 7 голови, Дибиров постигна 3, додека Калараш 2 погодоци.
