Vardar Fans
Вардарци одиграа неверојатен натпревар, црвено-црните успеаа по голема борба да го победат тимот на Алборг. Конечниот резултат гласеше 30:28.
Алборг беше тимот кој го отвори резултатот и кој во најголем дел од првото полувреме имаше предност, но лесно можеше и Вардар на одмор да замине со позитива. Вардар само во два наврати имаше водство и тоа со головите на Дибиров, додека Алборг во еден дел од првиот дел имаше позитива и од четири гола разлика. После резултат 4:4, противникот влезе во серија од 0:4 за по 11 минути игра резултатот да гласи 4:8. Томовски имаше само една одбрана, додека Гаде на спротивната страна забележа четири интервенции. Тоа беше знак за Вујовиќ да направи голманска измена која се покажа како вистинска одлука. На голот застана Борко Ристовски, со чии одбрани успеавме да се вратиме во игра и на полувреме да заминеме со нерешен резултат. Откако Борко ја забележа првата одбрана, погоди Дибиров за 10:11, па противничкиот тренер за прв пат побара тајмаут. Алборг повторно се одлепи на 10:13, но во 24 минута со голот на Валчак го израмнивме резултатот на 13:13. Ристовски имаше навистина добри одбрани, додека во нападот игравме со два пикери, односно без голман. Во последната минута Дибиров донесе и водство од 16:15, но во последните секунди од првиот дел данците погодија за израмнување на 16:16.
Сјајно отварање на вториот дел за Вардар, кој постигна два гола во серија, дело на Тото за предност од 18:16, а Ристовски стигна до нова интервенција. Каква двојна интервенција за Ристовски, атмосферата е пеколна во Јане Сандански. Вардар со голот на Оливие Њокас води и со највисоки три гола разлика (20:17). Дефинитивно Ристовски има свој ден на голот, стигна и до десет одбрани, а Вардар не користи два напади за плус четири гола. Лесно продаваме два гола, губиме топка во напад, за Алборг да намали на само еден гол негатива (22:21). Повторно успеваме да се вратиме во игра, со голови на браќата Њокас имаме водство од 25:22 во 47 минута. Неверојатни 14 одбрани на Ристовски кој брани пенал, додека Оливие Њокас носи највисоки 28:24 на 6 минути пред крајот. Попушти концентрацијата, за Алборг да дојде до гол негатива и напад, но Ристовски одбрани за вкупно 15 на неговото конто вечерва. На крајот Вардар слави со резултат 30:28.
Дибиров, Тото и Оливие Њокас имаа по 6 голови, додека Ристовски забележа 16 одбрани.
