Vardar Fans
Македонската репрезентација стигна до втората победа на Светското првенство. После Јапонија, избраниците на Гонзалез ја совладаа и селекцијата на Бахреин.
Бахреин беше селекцијата која прва успеа да го отвори резултатот, додека првото водство Македонија го имаше во 7.минута кога погоди Кирил Лазаров за предност од 3:2. Следеше добар период во нашата игра, во одбраната функциониравме одлично, противникот делуваше изгубено во нападот, што ни овозможи брзи контра напади и лесни голови преку Манасков и Лазаров, а претходно погоди и Кузмановски, за највисоки четири гола позитива (6:2) во 9.минута. Тоа беше знак за противничкиот тренер да повика тајмаут. Од тие моменти се сврти натпреварот во корист на Бахреин, кој успеа да направи серија од 0:5 и да направи реултатски пресврт, во 19 минута поведоа со 6:7 а нашата селекција повеќе од десет минути беше без гол. Конечно серијата ја прекинуваме во 21 минута кога погоди Лазаров за израмнување на 7:7. Борко беше добар на голот, стигна до својата шестта одбрана, но ние не успеваме да погодиме во два напади, преку Талески и Ѓорѓиески, односно голманот на Бахреин беше поуспешен. Сепак затоа е тука нашиот капитен, Лазаров кој успева да погоди и повторно да го врати водството на Македонија. За момент израмни, селекцијата на Бахреин (8:8), но нашите репрезентативци ја вратија играта од стартот на мечот и имаа фуриозен финиш на првите 30 минути. Со серија од четири последователни голови, од кои два беа на Манасков, по еден на Кузмановски и Лазаров, за на полувреме да имаме солидно водство од 12:8.
Во второто полувреме за одбележување се и погодоците на Чурлевски и вардарецот, Поповски со кој успеваме да зголемиме на 16:11. Македонија повторно заигра цврсто во одбраната, а Поповски максимално ги искористува минутите поминати на теренот, со неговиот втор гол и нов на Лазаров, стигнуваме до најголема предност од 20:13 во 47 минута од мечот. Шанса за настап добиваат и младите Серафимов и Танкоски кои се во поставата на Македонија, во моменти кога имавме висока предност. Немавме проблеми да го приведеме мечот до крајот и немаше резултатска неизвесност околу победникот. До крајот Бахреин успеа да намали за да избегне висок пораз, конечниот резултат гласеше 28:23.
Кирил Лазаров беше најдобар стрелец со 8 голови, додека Мартин Поповски постигна 3 гола. Утре за противник ја имаме селекцијата на Хрватска.
ФОТО:Gol.mk
