Vardar Fans
Нема одмор за младинската женска ракометна репрезентација до 19 години која напорно се подготвува за престојното Европско првенство, кое ќе се игра во Шпанија (Валенсија) . Оваа селекција има секој ден по два тренинга каде се работи на воигрување и тактичкиот дел. Се испробуваат различни варијанти на игра во нападот и одбраната. Се работи и на физичката подготовка, каде девојките трчаат на стадион и посетуваат теретана, која е во склоп на С.Ц. Јане Сандански каде и се одржуваат тренинзите.
Изминатиов викенд, избраничките на Симе Симовски одиграа два контролни натпревари во Габрово со селекцијата на Бугарија и на двата дуели забележавме победи. Првиот меч заврши со резултат 21:19 и вториот во наша корист со 19:18. Беше планирано со истиов противник да се одиграа два натпревари и тука во Скопје, но може да дојде до промена и тоа да не се случи. Пред заминувањето во Шпанија, може да се одигра уште некоја пријателска утакмица со некоја друга репрезентација.
За Шпанија се планира да се тргне на 19-ти јули, а ЕП започнува на 23-ти јули и ќе трае се до 2 август. Македонија е во група заедно со репрезентациите на Русија, Германија и Литванија. Нашата селекција во најголем дел ја сочинуваат ракометарки кои доаѓаат од Вардар. Драгана Петковска, Нина Ладева, Сара Митова, Нина Бојаџиска, Симона Стојановска, Ангела Тодоровска, Ангела Петровска, Теодора Керамитчиева, Стефанија Мишеска и Наташа Нолевска, се девојките кои изминатата сезона го носеа црвено-црниот дрес.
