Во петок не очекува дуел со Битигхајм, средба која би требало да биде само потврда на нашиот квалитет. На првиот натпревар на почетокот на февруари во Германија ние победивме со 38-26. И сега се очекува освојување на бодовите. До крајот на натпреварите од главната фаза треба да играме уште два натпревари, овој со Битигхајм и на гости кај Будуќност. Ни треба само победа против Битигхајм за потврда на првото место во групата. По повод овој дуел се одржа денес прес-конференција на која беа кажани следните очекувања:
Тренер Ирина Дибирова: Добро го познаваме противникот. Претходниот натпревар го добивме со голема разлика, иако првиот дел не беше лесен. Треба да играме перфектно за да победиме, и да ја решиме нашата задача во групата. На претходниот натпревар во Мец загубивме само порадите нашите грешки. Ни треба поддршката од трибините од сите, да бидеме сложни сите заедно дури и кога губиме. Треба да го вратиме победничкиот дух и да останеме на првото место.
Јованка Радичевиќ: В петок сакаме само да победиме и на тој начин да го решиме првото место во групата. Изгубивме од Мец, поразот дојде во право време, за да не летнеме во облаци и мислам дека загубивме само поради нашите грешки. Тие играа исто како и досега, само ние не бевме на нашето ниво. Со нашата добра енергија, добра одбрана ќе треба да стигнеме до победа. Битигхајм не намачи кај нив во првиот дел и ќе сакаат да не пореметат нашиот ритам.
Претседател на клубот Гордана Нацева: Очекувам дека со победа ќе ја завршиме главната рунда на домашен терен со што ќе го реализираме нашиот план, а со тоа ќе добиеме полесен тим за противник во четвртфиналето. Нашиот план беше да е биде прв во главната рунда и да се оди на Ф4. Битигхајм е во натпреварувачки ритам, но јас очекувам дека тимот ќе се консолидира по поразот од Мец и со една одлична партија ќе победиме.