Леонида Гичевска од Вардар, избрана за најдобар играч на последните два натпревари на кадетската репрезентација

Леонида Гичевска е Вардаровата гордост која не претставува на европското првенство за кадетки, кое во изминатиов период се одржува во Скопје. На последните два дуели на Македонската репрезентација, против селекциите на Шпанија и Германија, Леонида заслужено е прогласена за најдобар поединец кај нашите девојки. На натпреварот со Шпанија постигна три голови и беше втора по ефикасност во составот предводен од Јулија Дамчевска. Следеше меч со Германија, на кој младата Гичевска беше и најдобар стрелец постигнувајќи пет голови.

Оваа млада надеж на Македонскиот ракомет, настапува за втората екипа на Жрк Вардар со која ја освои младинската лига и третото место во најсилната домашна супер лига. Има само 17 години, пред која стои блескава играчка кариера. Леонида е убедливо најефикасен играч во Македонската кадетска репрезентација на ова европско првенство. Зад нејзиното име досега има впишано 18 погодоци. Очекуваме оваа сезона да добие повик за настап и во првиот тим на Жрк Вардар.