Радичевиќ во борба за најдобар стрелец на СП во Данска

Репрезентацијата на Црна Гора пред малку ги заврши настапите на светското ракометно првенство во Данска. За оваа селекција настапија три ракометарки на Вардар, Радичевиќ, Кликовац и Грбиќ, кои на крајот завршија на осмото место. Црна Гора не успеаа да се пласира во најдобрите четири екипи, откако во 1/4 беа поразени од Норвешка. Во разигрувањето за пласман од 5-8 место, Црнагорките најпрво беа поразени од домаќинот Данска, додека утрово во борба за седмата позиција доживеаа висок пораз и од селекцијата на Франција, за која настапуваат Дембеле и Лејно.

Така десното крило на Вардар и својата репрезентација Јованка Радичевиќ го заврши овој мундијал со вкупно постигнати 60 голови и се до одигрувањето на денешните натпревари за медал и пласман, ја држи првата позиција на листата на најефикасни стрелци. Најголема опасност за загрозување на оваа награда е Кристина Неагу од селекцијата на Романија, која пред денешниот меч за третото место има постигнато 53 голови. Помали шанси имаат и Каролина Кудлач (Полска) со 48 погодоци. Се надеваме дека денеска Неагу нема да има свој ден, како на претходните дуели и дека наградата за најдобар стрелец на ова светско првенство ќе припадне на Радичевиќ, која на овој мундијал пружи одлични игри.