Vardar Fans
Кадетките на ракометниот клуб Вардар со две победи стартуваа на 13-тото издание на турниот “Трофеј Белград“. Денес избраничките на Анжела Платон ги стартуваа натпреварите на овој турнир и забележаа две победи.
На првиот натпревар од групната фаза се сретнавме со екипата на Рудар, која ја совладавме со резултат 18:12. Во текот на целиот меч имавме постојано водство и контрола на резултатот. По првото полувреме имавме солидно водство од 9:4 и најавивме дека на крајот ние ќе ги освоиме бодовите. Противникот пружаше отпор во првите пет минути, кога резултатот на семафорот гласеше 3:3. Од тој момент следи серија на црвено-црните од 4:0, за прво поосетливо водство од 7:3. Во вториот дел се одржуваше оваа разлика и на десет минути пред крај имавме водство од 12:6. Вардарки не му дозволија на противникот да се доближи резултатски и на крајот заслужено победивме со резултат 18:12. Бојана Диневеска беше најефикасна со 4 голови, Марија Дамовска, Ива Цветковска и Ивана Блажевска постигнаа по 3. Два гола беа дело на Јована Величковска, додека по еднаш во листата на стрелци се запишаа Клара Трајковска, Тамара Паланковска и Елена Ивановска.
Вториот натпревар на кој се сретнавме со екипата на Авала беше понеизвесен и поинтерсен. Во текот на првото полувреме имавме на два пати водство од два гола (3:1) и (4:2), но до крајот на полувреме се замина со нерешен резултат од 6:6. Сепак во вториот дел, нашите кадетки предводени од одличната Бојана Диневска успеа да го скрши отпорот на противникот и на крајот да слави со резултат 16:13. Најпрво на стартот на вториот дел поведовме со 10:8, водство кое го зачувавме до самиот крај. Диневска беше нерешлива енигма за екипата на Авала, нашето крило го заврши мечот со 8 голови од исто толку упатени удари кон противничкиот гол. Марија Дамовска беше втор стрелец со 3 погодоци. Марија Танчева и Ива Цветковска постигнаа по 2.
Избраничките на Платон и Кузмановска имаа т големи шанси да се пласираат во полуфиналето, кое треба да го потврдат во текот на утрешниот ден. Во последното коло од групата се среќаваме со екипата на Јуниор.
