Рутинска победа на Вардар во дуелот со Прилеп, утре го играме финалниот дуел за пласман на Ф4 турнирот во купот

Екипата на РК Вардар очекувано се пласираше во финалниот дуел за пласман во полуфиналето на купот. Денес во големата сала на С.Ц. Јане Сандански, црвено-црните беа подобри од екипата на Прилеп.

Натпреварот со гол го отвори Чупиќ, за веднаш после него да погодат и Мишевски, како и Дибиров, додека првиот погодок прилепчани го постигнаа во 5.минута за намалување на 3:1. На голот на Вардар започна Марко Кизиќ кој стигна набрзина и до две одбрани. Ова беше рутински меч за вардарци, кои пред почетокот на дуелот важеа за големи фаворити. Следеше наша нова серија од 6:1, откако погодувавме преку Дибиров, Кисељев, додека три гола во серија постигна и Иван Чупиќ, за веќе убедливи 9:1, додека на вториот гол Прилеп чекаше до 11 минута кога го намали резултатот. Кизиќ беше одличен на голот, вече стигна и до својата седма одбрана, додека со погодокот на Дибиров имавме и предност од 12:3 во 13 минута од мечот. Пет минути подоцна стигна и двоцифрената предност од 15:5, со голот на Кисељев, додека Дибиров зголеми и на 16:5. Следеше период кога гостинската екипа направи мала серија и намали на 17:8, но вардарци повторно влегоа во ритам и со головите на Стоилов и Горбок поведовме со 20:8. По истекот на првите 30 минути бевме во предност од 23:11.

Во вториот дел на теренот ги видовме младите Савревски, Димчевски, Калајџиески, Грујовски и Димитријевски. Прилеп го постигна првиот гол во овој дел од мечот, додека во нашиот втор напад погоди Давид Савревски. Серијата за црвено-црните продолжи со головите на Грујовски, како и на Калајџиески и Димитријевски  за резултат 27:12 во 36 минута, додека двојна одбрана забележа и Марко Кизиќ. Вардарци успешно ја одржуваа оваа позитива, со нови голови на крилата Димитријевски и Калајџиески имавме предност од 33:16 во 42 минута од дуелот. Во наредните 13 минути, Вардар постигна 7, додека Прилеп само 3 гола, па резултатот на семафорот беше 40:19 на пет минути пред крајот. Конечниот резултат на овој дуел гласеше 45:21.

Најефикасен беше Калајџиески кој постигна 9, додека Дибиров беше стрелец на 7 гола. Дамјан Димитријевски постигна 6 гола.

Во финалниот дуел на 1/4 финалната група ќе играме со победникот од дуелот помеѓу екипите на Струга и Металург 2.