Во големото дерби во групата-Б, ЖРК Вардар гостуваше кај Металург во Автокоманда. Во еден квалитетен и возбудлив дуел покажавме зашто сме лидери и ги фрливме на колена домаќинките, ние победивме со резултат 21-22.
Отворивме со водство (0-1) преку Михаела Стојановска, домаќинот во следната акција изедначи. Вардарки имаа одличен старт на првиот дел па со три врзани гола поведоа со 1-4 во 7.минута кога Стојановска беше непогрешлива од пенал. Домаќинот врати со иста мерка и успеа да изедначи на 5-5 во 16.минута од дуелот. Трајкоска влезе во игра беше одлична на голот, во поле младата Борјана Коцева играше борбено, сите играчи го дигнаа нивото на игра и тоа донесе позитивен исход. Поведовме со четири гола (6-10) од како во стил на крило, нашиот пикер Катерина Дамјаноска украде една топка и во контра заби за плус четири. По една одбрана на Трајкоска и по брза транзиција успеавме прв пат да отидеме на плус шест на минута и пол до крајот, кога Миновска погоди неверојатно за 7-13. На одмор се замина со комотни за нас пет разлика, односно со резултат 8-13.
Металург одлично не затвори на крилните позиции во вториот дел, тоа го искористи за да ја анулираат нашата предност, со неверојатна серија 5-0 во 37.минута тие изедначија на 13-13 и го вратија натпреварот на почеток. Кога беше најпотребно, Трајкоска врза две одбрани, во напад тоа го награди Трпевска од пенал во 40.минута(13-15) кој со пожртвуван влез го избори Миновска. Домашниот тим не се предаваше, на своја страна имаше и играч повеќе па успеа со серија 3-0 да поведе (16-15). Ристова во „оган“ го уфрли најмладиот играч, кадетскиот голман Вероника Ѓорѓиевска. По неколу добри одбрани на тимот и нејзини две, во напад награди Трпевска со брзо истрчана контра погодувајќи за 16-19 во 48.минута.
Вардарки од прва до последна играа со срце, Џатевска командуваше со одбраната која во овој период од мечот беше непробојна. Анулиравме опасен напад за сино-белите да дојдат на само гол негатива при 17-19, Ѓорѓиевска фати „жива топка“ покажувајќи дека е најдобар кадетски голман во земјава и дека неправедно немаше место во селекцијата ова лето во кадетска конкуренција. Во напад изборивме пенал, нашиот „егзекутор“ за вакви прилики Стојановска погоди за 17-20 во 52.минута. Ни падна концетрацијата во финишот, домаќинот во 57.минута израмни на 20-20. Ваков меч и заслужуваше да заврши драматично, имаше до крај 235.секунди за решавање на победникот. Следеше Миха-Шоу, најпрвин Стојановска изведе пенал онака со „камен поглед“ се позиционираше на 7.метра, кон голот упати сигурен и секако прецизен удар, а потоа во следната акција погоди таму каде што некој не би ставил рака мина со цело тело крај два чувари и стрелаше за 20-22 на 2.минути и 05.секудни до крај. Повторно дојде невоља, исклучен играч и пенал за домаќинот. Намалија на 21-22, во напад промашивме, но ни домаќинот не ја совлада Вероника па победивме со минимални, но заслужени 21-22.
Сите девојки беа како една на овој меч, прв стрелец беше Стојаноска Михаела која имаше 7.гола, Трпевска Ивона погоди 6.пати,а Марија Галевска стрелаше 3.пати. Кај голманите Трајкоска впиша 6 одбрани, Ѓорѓиевска 4.пати сопра удар.
Со оваа победа и максимални 24.бода сме лидери на табелата, зад нас е Металург со дури шест бода заостаток зад црвено-црните дами.