ЖРК Вардар имаше лесна задача со РК Кузман, денес победивме со 40.гола повеќе од ривалот односно со резултат 52-12. По седум одиграни меча имаме седум победи и 21.бода, ние сме единствени покрај Куманово со максимален ефект во лигата.
Ривалот парираше се до 5.минута кога на четири наши гола успеа да врати со два, па на семафорот стоеше 4-2 по пет минути ракомет. Започна нашата серија и доминација со голот на Костовиќ Ангела, ние ги затворивме сите приоди кон нашиот гол, неколку одбрани имаше и Илиќ. До 16.минута имавме серија 9-0, погодуваа од контри Диневска, Миновска, која и асистираше неколку топки до Јаковчевска, со која поведовме со 13-2, потоа Кузмановска Александра побара тајм-аут за гостинот. Ристова во игра ги уфрли од клупата Стефаноска која повторно покажа зрелост за сениорски ракомет, Тошевска, Дамјановска и Попова кои го задржаа ритамот. На одмор заминавме со 20.гола повеќе, на погодокот за 25-5 го постигна Катерина Дамјаноска на 34.секуди до крајот на овој период.
Вториот дел започна во знак на Грујовска на нашиот гол и Буразер на противничкиот, двата тима не реализираа по три напада на стартот. Потоа започна нашата доминација, Галевска ја разигра играта во поле. Ние со пет гола поведовме со 30-5, Грујовска беше совладана прв пат дури во 9.минута од овој период. Доминиравме, одбраната беше супериорна, Грујовска одлична, во напад казнувавме па на 10.минути до крајот водевме со 43-7. Се беше веќе решено, само прашањето со колкава разлика ќе забележиме триумф беше отворено на овој дуел. Победата дојде со резултат 52-12 со голот кој на 45.секудни до крајот го постигна Цветковска, односно со 40.позитива за црвено-црните девојки.
Најперфектна од ракометарките беше Миновска Сара која погоди 6.пати од исто толку обиди, воедно имаше 4-5 одлични асистенции пред се до Јаковчевска во контрите, исти број голови имаше и Џатевска Ивана со само едно промашување. По 5.гола имаа капитенот Диневска Бојана која имаше 100% „стрелба“, исто така „5ки“ имаа Трпевска Ивона и Михаела Лазаровска. Ива Јаковчевска и Катерина Дамјаноска погодија по 4.пати, три гола имаа Галевска Марија, Сара Стојановска и денес одличната Сања Цветковска.
Голманите на Вардар имаа одличен процент, двете имаа близу 60% одбрането топки. Грујовска Симона дојде до 9.интервенции, Илиќ Андреа сопра 7.удара на ривалот.