Vardar Fans
Младинската ракометна репрезентација се пласирашe на европското првенство во Словенија. Изминативе три дена на Кале, Македонија беше домаќин на квалификациски турнир за пласман на ЕП. Избраничките на Борче Марковски на решавачкиот натпревар ги победија Фарски Острови и на тој начин го обезбедија второто место.
Мечот подобро започна за противникот кој во неколку наврати имаше водство од два гола. Сепак предноста на Фарски набрзина беше анулирана па се влезе во период каде двете селекции играа гол за гол. Во средината на првиот дел за прв пат, Македонија поведува со 8:7, за во следниот напад Фарски да го израмни резултатот на 8:8. Од тие моменти следи наша серија од четири последователни погодоци, за прв пат на натпреварот да имаме највисоки четири голови (12:8). Ова водство го задржавме до истекот на првото полувреме, дури и го зголемивме за еден гол, па на одмор се замина со солидно водство на нашите младински од 15:10.
Првите два гола во вториот дел ги постигна Фарски Острови за намалување на 15:12, но во следните шест минути Македонија ги враќа највисоките пет гола (18:13). Во продолжение од мечот следи мала криза во играта на нашите девојки, кои дозволија на Фарски да ја стопи нивната предност на само два гола (19:17). Сепак на ова враќаме со два голови во серија, за на шест минути пред крај да имаме недостижни 21:17. До крајот по два гола на двете страни, за конечен резултат од 23:19.
Победничко селфи !
Леонида Гичевска од Вардар ги предводеше младинките до триумф со 7 постигнати голови, додека Анастасија Николовска постигна 3. Еднаш во листата на стрелци се запиша и Ана Иванова. Дел од репрезентацијата на овој турнир беа девет ракометарки од Вардар. Се работи за Гичевска, Николовска, Иванова, Велкова, Мицевска, Кицеска, Филипоска, Георгиевска и Станиќевска.
