Ракометарките на Вардар јуниор предводени од Симе Симовски обезбедија четвртфинале во Челинџ-купот. Тие денес во осминафиналниот двомеч со српска Минаква Војводина победија со 31-27 , овој дуел како и вчерашниот се играше во Спортскиот Центар „Јане Сандански”.
Во овој меч кој донесе историски пласман за овој млад клуб отворивме на почетокот со 2-0. Потоа следеше израмнетиот период во продолжение, сепак црвено-црните ракометарки на Јуниор во 16.минута со играч помалку на теренот се вратија во мечот повторно со предност од два гола 9-7. Предводени од Теодора Керамитчиева и Наташа Нолевска, на четири минути пред крајот стигнаа до три гола предност 14-11. Таа предност остана и до крајот на првите 30 минути бидејќи паднаа по два гола во двете мрежи. На одмор се отиде со 16-13. Во првиот дел доминираше Керамитчиева која даде пет а Нолевска даде гол помалку-четири.
Фуриозно тргнаа црвено-црните јуниорки во вториот дел, па разликата преку двете најефикасни ракометарки на овој меч константно ја зголемуваа и во 44-та минута стигнаа до најубедливи плус седум голови (25-18). Нашите ракометарки ја држеа разликата од шест голови речиси до самиот крај, па Војводина сѐ што успеваше да направи е да дојде до минус пет. Во финишот, повторно Вардар јуниор стигна до највисоките седум голови 30-23.Србинките се обидоаа да намалат ама не беа доволно добри во тоа, а девојките покрај моменталната предонст имаа и 2 плус од вчерашниот дуел . Мечот заврши со конечни 31-27 со што се изборивме за историски пласман во 1/4 финалето од Челинџ купот.
ЖРК Вардар јуниор: Белмезова, Прленда 2, Петровска, Стојановска 2, Трпковска 3, Ѓорѓиевска, Николовска 1, Митова 4, Бојаџиска, Ладева, Нолевска 9, Велкова, Џини, Керамитчиева 9, Мишевска, Гичевска.