Македонија поразена од Црна Гора, Сара Миновска се запиша во листата на стрелци

Женската сениорска ракометна репрезентација на Македонија доживеа пораз од Црна Гора, на натпревар во рамките на ЕХФ Купот. Во С.Ц. Борис Трајковски избраничките на Савевски беа поразени со резултат 21:29.

Долго време ни требаше да го фатиме потребниот ритам на натпреварот, на кој првиот гол го постигнавме дури после десет минути игра. Сепак во еден период од првиот дел стигнавме и до израмнување на резултатот, но со серија на погодоци селекцијата на Црна Гора на полувреме се одлепи на четиро гола разлика (13:9). После десет минути игра во вториот дел, Македонија се врати во игра кога намали на само еден гол негатива, но следеше лош период во нашата игра, противникот поведе и со највисоки шест голови разлика, за на крајот да стигне и до убедлива победа.

Од вардаровите ракометарки, во листата на стрелци се запиша Сара Миновска која постигна два гола, додека во составот беа Коцева и Џатевска.