ЖРК Вардар реди успеси во 2021, дојде до четири победи на четири официјални дуели оваа ракометна пролет. Денес го пречекавме „жилавиот“, засилениот и борбен тим на Спартак од Кисела Вода. Оваа средба ја добивме со резултат 31-22 (15-11).
Дуелот започна со водство на гостинките (0-1), ние веднаш вративме преку капитенот Диневска од пенал. Се играше гол за гол се до 7.минута кога на семафорот беше 4-4, спартанки првпат се одлепија со два врзани гола. Гроздановска, екс вардарката погоди за 4-6 во 8.минута. Веднаш се смени ритамот на нашата игра, ова ни дојде како шок. Трпевска за 60.секнуди со продори изедначи (6-6) потоа ние бевме во налет. Со серија 7-0 во 16.минута направиме пресврт и поведовме со 11-6 преку Трпевска од пенал.
Трајкоска на нашиот гол беше совладана по 10 минути, кога исто така поранешната вардарка, Коларовска стрелаше за 11-7 во 17.минута. Ние не ја испуштавме предноста, во одбаната игравме цврсто, Џатевска и Дамјаноска кои добија по две исклучувања беа одлични и сурови препреки за ривалот. Во нападот голем придонес даде младата Коцева, константната Трпевска и полетната Миновска. Трпевска имаше шест гола во овој период, 7.одбрани впиша Трајкоска. На одмор заминавме со предност од 15-11.
Ривалот се закани во вториот дел, намали на 17-14 и имаше напад за преполовување на нашата предност од првите 30.минути . На нашиот гол нововлезената Грујовска Симона имаше одбрана, а во напад најмалата во тимот, Сара Стефаноска погоди за 18-14. Противникот се реши за „фластер“ на Галевска, но Ристова и Царчев одговорија со напади 7 на 6 што е новина во нашата игра. По половина полувреме имавме пет позитива, Грујовска одбрани по брза трансформација атрактивно погоди Миновска Сара за 22-17. Спартак денес играше доста борбен дуел постојано се обидуваше да се врати во игра, во 49.минута имаат три негатива 23-20 и напаѓаа да дојдат на два. Од тој момент до крајот вардар покажа шампионско лице, направиме серија која донесе шест гола повеќе. Одбраната беше на ниво, Грујовска за 11 минути прими само два гола, таа денес беше одлична и двоцифрена, во нападот бевме одлични па победивме со девет гола повеќе. Конечните 31-22 ги постави Дамјаноска Катерина со пожртвуан пад покрај два чувара на 4.секунди до крајот.
По подолго време имаме две двоцифрени девојки, Трпевска Ивона постигна 10 гола. таа цела пролет е прв стрелец, денес имаше одлични 85% ефикасност во нападот. Симона Грујовска исто така блесна, бранеше во 2.полувреме и сопре 11 топки. Денес имаше високи 50% сопрени удари (11/22). Во првиот дел Трајкоска Јована впиша 7ца зад своето име, по четири гола имаа: Дамјановска Катерина (80% ), Диневска Бојана и кадетката Коцева Бојана, „тројки“ впишаа имењачките Сара Миновска и Стефаноска Сара.
Кај противникот Коларовска Аба Марија погоди девет пати.