Vardar Fans
Денес Вардарки го играат реванш натпреварот од четвртфиналето од лигата на шампиони со екипата на Ларвик. Веќе нашите девојки одржаа два тренинга во “Болигмапа“ арената и подготвени ги очекуваат последните 60 минути, кои треба да ги одработат за да обезбедат нов пласман на заршниот турнир во Будимпешта. Таму се веќе екипите на ЦСМ Букурешт и Ѓер. Романките успеаа да направат голем подвиг и изненадување и да го елиминираат фаворизираниот Ростов Дон, кој во двете групни фази немаше забележано ниеден пораз. Букурешт забележа уште една минимална победа и на гостувањето во Ростов, која беше доволна за пласман на Ф4. Во другиот четвртфинален меч, екипата на Ѓер уште еднаш високо го порази тимот на ФТЦ и по пауза од една година се враќа на завршните турнири.
Денес треба да се комплетираат и останантите два учесника кои ќе патуваат во Будимпешта. Големи шанси да се најдат таму се Вардар и Будуќност. Нашите девојки одиграа феноменален прв натпревар во Јане Сандански, победувајќи со високи 34:20. Сепак овој резултат не смее никако да не залажува и денес мораме да одиграме на нашето препознатливо ниво и ниту во еден момент да не му дозволиме на противникот да се понадева дека може да направи нешто повеќе. Атмосферата е одлична во нашиот тим, кој со нетрпение го очекува почетокот на овој натпревар, кој е закажан за 15:30 часот. Екипата е комплетна нема повредени играчи, па двоецот Камара-Кастратовиќ може да смета на сите девојки за овој реваш со Ларвик. Директен пренос од натпреварот можете да проследите на МРТ-1.
