ЖРК Вардар одигра уште еден контролен натпревар со репрезентацијата на Гвинеа

Денес, во малата сала на СЦ.Јане Сандански, вардарки одиграа уште еден тест натпревар против репрезентацијата на Гвинеа, кој заврши со нерешен резултат 25:25 (12:13).

Избраничките на Царчев и Платон подобро го отворија натпреварот и во два наврати имаа водство од три гола разлика, кога резултатот беше 3:0 и 5:2. Репрезентацијата на Гвинеа се врати во игра, го израмни резултатот на 7:7, за до крајот на првиот дел да гледаме игра гол за гол на двете страни, а противникот на кратка пауза замина со минимално водство од 12:13.

Во вториот дел, Гвинеа се одлепи на највиски четири гола разлика (14:18), сепак вардарки фатија ритам и со серија на погодоци израмнија на 19:19. Во последните четири минути, противникот влезе со водство од 22:24, но нашиот тим се избори за нерешени 25:25 на овој контролен натпревар.

Најефиксна во нашиот состав беше Ивона Трпевска која постигна 14 голови. Во листата на стрелци се запишуваа уште и Леона Миленкоска (4), Борјана Коцева (2), Дона Тодоровска (2), Нина Милевска (1), Бојана Радевска (1) и Симона Василева (1).

На голот, Андреа Илиќ имаше 8 одбрани, додека Вероника Ѓорѓиевска запиша 5 интервенции.