Сениорската ракометна репрезентација на Македонија стигна до втората последователна победа во дуелите со Фарски Острови, откако вечерва на Кале избраничките на Симе Симовски славеа со резултат 28:24, во рамките на четвртото коло од квалификациите за пласман на Европското првенство во Франција.
Заслужена победа на Македонија, ако се земе во предвид предноста во текот на целиот меч и контролата на реултатот. Натпреварот започна со по два гола на двете страни (2:2), што беше прво и единствено израмнување на овој натпревар. Набргу нашата селекција постигна три голови во серија и поведе со 5:2. Делуваше сигурно нашата одбрана, што ни овозможи на средината на првиот дел да имаме највисоки пет голови разлика (8:3). До крајот на првото полувреме гледавме мал број на погодоци, како резултат на грешките кои ги направија двете репрезентации и избрзаните напади на Македонија, но се пак на одмор заминавме со резултат 14:8.
На стартот на вториот дел, во два наврати имавме предност од најголеми седум голови ралика, а Фарски Острови најмногу што успеа да стори е во еден дел на мечот да намали на четири голови негатива. Имаше контрола на резултатот нашата репрезентација и разликата се движеше од 4-6 голови предност за Македонија. Немаше сили, противникот да направи некаква возбудлива завршница, па истекот на 60-те минути, конечниот резултат гласеше 28:24.
Најефикасна ракометарка во нашите редови беше левото крило на Вардар, Јована Саздовска која постигна седум голови. Од Вардарките во листата на стрелци се запишаа уште и Мирјета Бајрамовска која постигна три голови, додека по два гола беа дело и на Теодора Керамичиева и Сара Ристовска.
До крајот на овие квалификации, остануваат уште натпреварите со Србија на гости, и со Шведска на домашен терен.