Вардаровите кадети загубија од домаќинот Ратгебер Академија

Кадетите на Вардар го доживеаја првиот пораз на завршниот турнир од EYBL лигата откако попладнево загубија од домаќинот Ратгебер Академија со 69-87.

Унгарскиот тим многумина го сметаат за најголем фаворит за титулата, а тој тоа го докажа со двете убедливи победа, прво против Хонвед, а сега и во дуелот со Вардар. И покра тоа, „црвено-црните“ одиграа добро прво полувреме во кое водеа и со 14 поени разлика (20-6), но тоа темпо не успеаја да го задржат подолго време.

Пред крајот на првата четвртина Ратгебер се доближи на 22-23, во втората два пати имаше и минимално водство, но Вардар некако успеа да се избори за минимална предност на полувреме (41-40). Унгарците ја почнаа својата доминација на средината од третиот квартал кога по 44-44 направија 13-2 и дојдоа до двоцифрена предност. Вардар се држеше до крајот на четвртината, но во последните десет минути Ратгебер ја достигна највисоката разлика, од 22 поена (85-63).

Григориј Ѓорѓевиќ беше најдобар во тимот на Вардар со 16 поени и 9 скока, Ефтимовски дојде до 15, а се истакна и Алексеј Нешовиќ со 14 поени, вклучувајќи четири тројки. Еден од најзначајните фактори за победата на Ратгебер беше тоа што го запре Терзиевски кој остана на само десет поени, далеку од неговиот просек од 22,7 во досегашниот дел од сезоната.

За Вардар ништо не е загубено бидејќи во дуелите со Хонвед и Будуќност може да се избори за место во финалето. Хонвед веќе го победи на претходните турнири, а со него игра утре од 12 часот.

извор:kos.mk